کمال ترک نہیں آب و گل سے مہجوری 

کمال ترک ہے تسخیر خاکی و نوری 

میں ایسے فقر سے اے اہل حلقہ باز آیا 

تمھارا فقر ہے بے دولتی و رنجوری

نہ فقر کے لیے موزوں ، نہ سلطنت کے لیے 

وہ قوم جس نے گنوایا متاع تیموری

سنے نہ ساقی مہ وش تو اور بھی اچھا 

عیار گرمی صحبت ہے حرف معذوری 

حکیم و عارف و صوفی ، تمام مست ظہور 

کسے خبر کہ تجلی ہے عین مستوری 

وہ ملتفت ہوں تو کنج قفس بھی آزادی 

نہ ہوں تو صحن چمن بھی مقام مجبوری 

برا نہ مان ، ذرا آزما کے دیکھ اسے 

فرنگ دل کی خرابی ، خرد کی معموری